Fèt Nasyonal Vodou: Èske Ayiti ta dwe suiv egzanp Benen?

Malgre enpòtans vodou nan kilti ak listwa Ayiti, okenn fèt nasyonal pa egziste pou onore relijyon sa a. Nan Benen, chak 10 janvye, yo selebre yon evènman espesyal: Fèt Nasyonal Vodoun. Se yon jou kote yo onore kilti ak relijyon vodoun, ki se yon eleman enpòtan nan eritaj espirityèl peyi sa a. Fèt sa ranmase plizyè aktivite tankou, dans rityèl, ak seremoni pou onore divinite yo. Li pa sèlman reprezante yon fèt relijye, men yon mwayen pou mete vodoun nan kè idantite nasyonal Benen.

Men, kisa nou ka di de Ayiti, yon peyi ki renome pou pratik vodou li yo? Èske Ayiti ta dwe pran egzanp Benen pou etabli yon fèt nasyonal ki dedye a vodou?

Vodoun nan Benen: Yon Rekonesans Ofisyèl

Fèt Nasyonal Vodoun nan Benen se yon fèt relijye, men tou yon ak politik ki mete vodoun nan yon pozisyon onorab. Jounen sa sèvi pou chanje pèsèpsyon monn nan sou vodoun, yon relijyon yo souvan estigmatize. An menm tan, li ede ranfòse inite nasyonal yo a epi atire touris ki anvi dekouvri richès espirityèl ak kilti Benen.

Ouidah, yon vil istorik ki gen gwo enpòtans nan vodoun, tounen yon sant atansyon pandan moman fèt sa a. Sa tou kreye yon opòtinite ekonomik ak kiltirèl pou Benen, pandan y ap onore zansèt yo.

Vodou an Ayiti: Yon eritaj sèten men ki toujou nan lonbray.

An Ayiti, vodou te jwe yon wòl san parèy nan batay pou liberasyon peyi a. Seremoni Bwa Kayiman an 1791 rete youn nan pi gwo egzanp kote vodou te sèvi kòm fòs linite kont esklavaj. Malgre sa, vodou rete majinalize nan peyi a. Relijyon sa a toujou fè fas ak estigmatizasyon e li souvan asosye ak bagay ki "negatif" oubyen "fòs fènwa".

Li enpòtan pou note gen plizyè selebrasyon vodou ki fèt an Ayiti, tankou fèt lwa yo ki kowenside ak fèt patwonal katolik yo, oswa fèt Gede nan 2 novanm. Men, okenn nan selebrasyon sa yo pa gen estati ofisyèl tankou yon fèt nasyonal vodou.

Pouki Ayiti ta dwe gen yon Fèt Nasyonal Vodou?

Idantite ayisyen an baze sou yon melanj kilti ak espirityalite kote vodou gen yon plas santral. Etabli yon fèt nasyonal vodou t ap gen anpil avantaj:

1. Rekonesans Kiltirèl: Yon fèt konsa t ap ede bay vodou respè li merite kòm pati esansyèl nan kilti ayisyen an.
2. Inite Sosyal: Fèt sa t ap rasanble tout Ayisyen, kèlkeswa kwayans yo, alantou yon patrimwàn komen.
3. Reyònman Entènasyonal: Tankou Benen, Ayiti ta ka sèvi ak fèt la pou atire touris k ap chèche konekte ak eritaj afrikèn yo.
4. Opòtinite Ekonomik: Atizana, dans, mizik, ak lòt aspè kilti vodou ta ka benefisye pandan yon fèt nasyonal.

Tabli yon Fèt Nasyonal Vodou an Ayiti pa t ap fèt san defi. Relijyon vodou toujou fè fas ak anpil opozisyon, sitou nan kominote relijye yo ki konsidere li kòm yon "danje espirityèl." Yon travay sansibilizasyon t ap nesesè pou ede moun konprann valè relijyon sa e retire estereyotip yo. Anplis, inisyativ sa t ap mande sipò gouvènman an, òganizasyon kiltirèl, ak lidè kominotè yo pou garanti li reyisi.

Konklizyon

Benen montre yon relijyon majinalize, ka tounen yon poto mitan pou inite nasyonal ak fyète kiltirèl. Ayiti, yon peyi kote vodou gen rasin li byen fon, ta ka pran egzanp sa pou bay eritaj li plis valè. Yon Fèt Nasyonal Vodou t ap yon opòtinite, pa sèlman pou selebre yon relijyon, men tou, pou onore listwa ak lespri yon pèp ki te rive vin premye repiblik nwa gras ak fòs vodou.

 

Pou ou jwenn plizyè atik enteresan :

• Ale nan ribrik tchala egzamen ofisyèl yo la : https://www.haititchala.com/p/tchala-ns4.html la : https://www.haititchala.com/p/tchala-9eme.html epi la :
https://www.haititchala.com/p/ti-sekre-ueh.html

• Ale nan ribrik sante a la : https://www.haititchala.com/search/label/Sant%C3%A9
• Ale nan ribrik seksyalite a la : https://www.haititchala.com/search/label/Sexualit%C3%A9
• Ale nan ribrik edikasyon an : https://www.haititchala.com/search/label/%C3%89ducation
• Ale nan ribrik istwa a la : https://www.haititchala.com/search/label/histoire%20et%20politique
• 
  
• Découvrez la réalisation des chefs d'États à travers ce lien: Le Chef d'Etat en plusieurs points

• • Klike sou lyen sa a, si w vle pibliye sou haititchala.com : InfoPUBLICATION

    -- 
    

    VWA TOUT MOUN KONTE !

    Ann konekte sou 

    Facebook Twitter Instagram