Lekòl pwofesyonèl nan peyi a, nesesite pou yon inovasyon

Lekòl pwofesyonèl nan peyi a, anpil ladan yo bezwen gwo pase men. Yo dwe repanse politik administrativ yo, konsa tou fòk yo revize tip ak kalite pwofesyon y ap ofri. Atik sa pa gen objektif pou li long, oubyen pou dekouraje w li l. Atik sa ekri paske mwen santi ke mwen sipoze atire nou si sijè sa ki a la fwa enpotan e ki gen gwo enpak sou avni peyi a.

Lekòl pwofesyonèl kou kèk inivèsite arive twonpe vijilans anpil moun nan sosyete a, san nou p ap retire okenn nan merit yo genyen pou kalite travay kèk nan yo souvan rive ofri sosyete a epi  ki itil kèk jèn nan plizyè domèn. Malerezman tout pa fonksyone avèk menm objektif, genyen ki gen karaktè biznis oubyen estil raketè.

Kòman w konprann yon seri lekòl pwofesyonèl pa janm milite ou siyen kèk patenaria oubyen okenn  akò avèk Leta Ayisyen dekwa pou jenn diplome yo kapab travay depi yo gen konpetans, dayè yo deja kalifye swit apre fòmasyon yo, pou plis respekte nan sosyete a, nou kwè yo bezwen yon sèvis dakonpanyeman. Men sa m vle di, anpil nèg ki fini nan yon lekòl pwofesyonèl konn pral travay kòm mannèv ak yon moun ki pa menm pase nan lekòl pwofesyonèl. Menm moun ki soti nan lekòl pwofesyonèl la pa otomatikman pi bon ke bòs woutinye a. Men pwofesyonèl la sipoze gen lwa ki pou pou pwoteje l.

Dezyèmman, non sèlman yon lekòl pwofesyonèl pa dwe lage yon etidyan l de bra balan san okenn pwosesis ki etabli pou ede jèn sa yo yon fason pou yo jwenn travay. Men gen yon detay ankò ki genyen. Nou kwè lekòl pwofesyonèl yo sipoze redefini modèl pwofesyon y ap mete yo si yo pa sou blòf. Pa egzanp gen yon bann pwofesyon nou mete, nou byen konnen moun yo pap jwenn travay pou yo, nou fè jenn yo aprann yon bagay pandan anviwon 2 zan pafwa, pandansetan yo pral jwenn yon bout papye sèlman. Donk yon seri pwofesyon ki pap vrèman aksesib pa rapò ak reyalite mache travay nou an. Etidyan an ka aprann yon bagay pandan ke mache a pa vreman gen plas pou bay moun sa travay, oubyen li aprann yon bagay kote ke li menm, li vin pa konpetitif sou  mache a. 

Mwen jis pran enfòmatik la kòm echantiyon, nou konnen tout pwofesyon ka itil ou ede nenpòt ki moman nenpòt kilè, men l ap enpòtan pou n mete pwofesyon ki adapte a reyalite mond lan, reyalite peyi a. Se pa aprann pou aprann, men se aprann pou chanje, pou amelyore kondisyon lavi moun yo, pou transfòme sak ki nesesè. Mwen ta renmen pou lekòl pwofesyonèl nou yo vini avèk inovasyon. Nou bezwen yon sistèm nouvo ki pou ede ti moun pwodui epi repwodui.

Fòk moun yo pa toujou depann de patwon, fòk gen pwofesyon ki rann  moun lan an mezi pou yo kreye, pou yo inove, pou kapab an mezi pou garanti pwodiktivite. Yo kapab, men fò n mete yo nan espas pou yo pwodui, tout peyi a plen lekòl pwofesyonèl, men se prèske toujou menm bagay la chak ane.

Nou plis gen lekòl k ap fòme moun pou yo toujou gen depandans de yon patwon pi souvan, se pa yon pwoblèm sa ye, men twòp pwofesyonèl nan chomaj akoz nou pa gen pwofesyonèl ki an mezi pou inove, fòk responsab lekòl pwofesyonèl yo modènize tèt yo epi redefini disiplin yo oubyen opsyon yo anndan Enstitistyon  yo.Nou bezwen ajoute bon jan disiplin ki baze sou otonomi, kote kad yo ap ka bay ou ofri sèvis menm san yo pa toujou sou depandans dirèk de yon patwon. Konsa n ap rive redwi chomaj e pi lwen nou ap sispann enpòte, paske nou pral pwodui plis. Chanje metòd jounen jodi a, se yon enperatif li ye pou nou. Konsa peyi a ap youn nan pi gran benefisyè yo.

BOSSÉ Cliford