Le journal intime d’un étudiant kidnappé

Anfèt, atik sa te sipoze ekri nan lang fransè, men, le w strese, yo kidnape w, pa gen okenn mwayen pou mo voltè ak Wouso te pran tan yo envante a, monte dwat nan tèt ou. Bon kidnapin nan se yn zak ke bandi komèt pou nwi kretyen vivan. Etidyan, komèsan, timoun pase nan woulo a. Tande istwa m nan…

Jou sa yo, ou tèlman tande kidnapin nan tèt ou, alafen ou di, tou pam nan deyè. Se yon men sòl, sof ke ou pa konn kilè wap touche. Mwen te toujou panse ke God la ak lespri yo tap pwoteje m, jiskaske yon machin ateri sou mwen epi yo fè m monte. Nan moman an ke w ap bat, ou santi w ta kouri, kriye, batay, men w tande nenpòt fo pa wap mouri. Antanke etidyan wap fè tèt ou travay. Ah monchè, map rele anwey, nèg yo paka tirem nan mitan lari a, pandan ke tout moun sa yo la. Men nan menm moman an wap sonje ke doktè mouri gran lajounen la nan aveni Kristòf, nèg yo menm touye ti bebe. Aprè refleksyon sa, lojikman , ou oblije monte machin nan san plenyen e dwèt sou bouch.

Ou nan yon machin tente, wap pase bò lapolis yo pa we w (ala rive lapolis, yo pa wè si yo kidnape m). epi te kwè yo te di detente tout vit ( bon brèf ann bay sa vag). Nèg yo ap pale nan machin nan, mande w si w pa gen moun lotbò, sa moun lakay ou ap fè, ki pwofesyon w ?. se nan moman sa, ou komanse reyalize , ou pral komanse yon vwayaj kap long e difisil. Lè w rive nan baz, nan tèt pa w, ou panse sèl oumenm kap la, ou remake gen menm 10 moun kap tann paran yo bay kòb. Kè w kase vip pandan ou konn manman w ap redi kwabosal, papaw ap redi fè kou nan lekòl bòs Masèl e yo dwe l 10 mwa. Ou poze, ou rete tèt frèt, wap di tèt ou map ka sòti la, dyadya yo ap voye je sou mwen.

Yo diw rele paran w, wap fè resistans, aprè plizyè souflèt , ou santi kèk dan komanse souke, ou bay nimero, alo papa, kman w ye, epi boom yo rale telefòn nan nan men w. mesye si w pa bay 2 milyon dola vèt, ou pap wè pitit gason w lan ankò. Apèl koupe, epi wap fè refleksyon, paran w te mèt ap fè 15 zan travay yo pap kapab peye. Ou sonje ou gen 3 tifrè ak 3 ti sè dèyè. Ou deside animal nan mal li nan mal nèt. Wap prepare diskou pouw bay nèg yo, ou anvi touche moral yo. Diskou w la pati konsa. Ah mesye ke nou touye m nou fini, kote moun lakay mwen pral jwen kòb sa. Se fake nap bay, sou radyo nap di nap batay pou pèp epoutan se pitit pèp nap kidnape. Ke nou touye m , moun lakay mwen pap bay yon goud. Lanmò te toujou yon pasaj oblije, ke m mouri m fini. Men pandan panse sa yo ap fèt se nan menm moman an, ou tande yap di yon moun, oumenm ou gen 2 semen la, yo poko janm peye, nou pa gen lopital ni ofelina la, nap likide w pou nou fè plas. Nan moman an, panse w chanje, ou paka jwe nan mind nèg yo.

Kèk jou pase, wap mal manje, mal dòmi, ou toujou panse sa ap denye dòmi w, manman w nan radyo, papa w nan mande prete, Andre Michel ap pale defen Jomo mal, Lanbè ap kriye pou prezidan, Aryèl ap siyen akò, pa gen pèson ke moun lakay ou, ak etidyan kap batay pou w lage. Bob C limenm se show lap fè, manman w pa gen opsyon ankò, e se nan moman sa , wap wè jan lavi enpotan, tout lide ap pase nan tèt ou.

Ou jis resiyen w, ou tonbe na pale ak nèg yo, ou mande sigarèt pouw wè siw ta voye kèk nway ale, nèg la diw non, ou ka disparèt sou li, epi oumenm ki pa menm konprann sa lap di a, nap bay blag , yo resi dakò baw yon ti jwen. Nan sosyalize, yo redwi kòb la a yon milyon goud, paranw ap lite, etidyan ap manifeste, trip ou ap fann, wap mande kilèw ap sòti. Jou yo kouri lan, lanwit bon jan fè nwa, ou anvi mouri pou sa fini, men sa pap chanje anyen, tout nèg pral di adye, yo pral poste diskouw , yo pral baw menm lòv yo te bay ti bway ki te di leta espistemofòb la, men aprè tou, se paranw kap pran pi gwo kou a, se paran w ki pral plis santi vid la. Nan reflechi, pòt ouvè, ou tande moun lakay ou bay yon milyon goud la, kèw kontan, wap pase pami moun ki la yo pouw ale. Eskew ka kontan, pandan wap gad kèk endividi ki la , e genyen kip a menm gen moun pou rele pou mande peye pou yo, se jis jounalis kap fè lobi e kap ekri gwo atik an fransè.

Lèw resi deyò, wap gad konbyen dèt moun lakay ou genyen, wap gad yon ti bway ki kouche yon sew pou l ba li kòb pou konplete pou lagew, wap gad lekol ti frew ki paka peye paske kòb la al peye bandi. Aprè tout pwoblèm sa yo, lew ap mache nan lari a , tèt ou pa poze, se vre yo te kidnape w, men pa gen okenn garanti ki di yo pap pran w ankò. Si se yon babekyou ou ta manje, fòk ou konnen nan manje l, ka gen ti farinay, ti lapli e lè sa wap tankou Izo e ou paka kouri twò fò paske chen mechan ka devore w, pouw mete w anba men lanmò san jou, oubyen bòs manno.

Otè anonim