Renmen tout pati nan kò w ak menm dimansyon lanmou
Depi lè m tou piti, m toujou tande moun ap di, yo gen pati yo pi renmen nan kò yo ak pati yo pa renmen. Epi chak fwa m eseye mande yon moun kisa li pi renmen nan kò l, li toujou gen difikilte pou l di m youn. Poutan, lè m mande l sa l pa renmen, li di m li san ezite. Sa ki montre m, moun lan panse ak pati lan kòl li pa renmen an plis pase sa li di l pi renmen an. Gen moun se nen yo, yo konn di yo pa renmen paske l twò plat, gen moun se je yo, yo di, paske yo twò gwo, gen moun se pye yo paske yo kwochi, genyen lòt moun menm ki di se tete yo paske l twò gwo elatriye.
Dènye fwa sa pral plis frape m, se pandan m ap tande de moun k ap pale, youn mande lòt la kisa l pi pa renmen nan li, moun nan reponn : « Se sèl bouch mwen m renmen nan figi m, apre sa m pa renmen anyen ankò ». M sezi, mwen mande tèt mwen, kòman yon moun fè pa renmen je l ki pèmèt li admire lanati epi ki pèmèt li ka wè chak grenn moun li di li renmen? Kòman l fè pa renmen nen l ki pèmèt li respire? Menm jan an pou zòrèy li, ki fè l kapab idantifye chak son, anplis se zòrèy li ki fè l kapab tande lè moun ap pale? Koze sa yo fè m vin ap mande tèt mwen : èske se pa depi moun nan piti kèk moun ap plede repete l, li gen yon pati nan kò l ki pa bèl, ki vin fè li pa renmen pati sa? Oubyen èske se pa paske moun nan pa gen konfyans nan tèt li?
Anpil fwa, se jan moun k ap fè edikasyon timoun yo, ki fason yo trete yo ak sa y ap di ak moun ki bò kote timoun lan ki fè yo vin gen yon pati nan yo, yo pa renmen. Pi lwen edikasyon maltaye timoun lan sibi a rive fè l pèdi konfyans nan tèt yo. Pafwa nou konn di yon moun yon bagay, nou annik fin pale avè l nou bliye sa nou te di. Poutan anpil fwa, nou konn gen yon fraz nan sa n t ap di yo ki rete nan tèt moun nan ki pa janm soti. Fraz sa ka fè moun nan tèlman pèdi konfyans nan tèt li, li rate yon pakèt bagay nan lavi l. Pa di moun nenpòt bagay menm pou blag.
Ou menm ki pa renmen tout pati nan kò w ak menm dimansyon lanmou, pa bliye se chak pati nan kò w ki mete ansanm ki fòme moun ou ye a fizkman an. Sa vle di nenpòt jan li ta ye, li reprezante w, li se ou menm. Lè ou menm, ou nan konfli ak pwòp tèt ou, ou pa alèz avè l, kòman ou pral vle moun k ap gade w la aksepte w jan w ye a si ou menm ou pa rive fè l? Kòman ou pral mande l renmen w jan w ye a si ou menm ou pa rive fè renmen w avantou?
Pi lwen toujou, gen moun ki di yo pa renmen fòm kò yo, paske tou senpleman lan sosyte a, gen yon kritè ki di men kòman yon moun dwe ye pou l bèl. Poutan, kritè sa yo se menm nou menm ki fè yo. Mwen m ap di w, ou pa bezwen gen yon fòm kò estanda pou w bèl, pou w santi w fyè. Paske lè ou pa alèz ak kò w sa anpeche lapè tabli ni nan lespri w ni nan nanm ou. Pa bliye tout kote ou prale se kò sa w ap di ou pa renmen an ki reprezante w. Aprann bay tèt ou tout lanmou li merite.
Gen moun se koulè po yo ak cheve yo, yo pa renmen. Poukisa? Paske zòt di se tip cheve siwèl ak koulè po jòn ki bèl. Pou fè fas ak estereyotip sa yo, gen moun ki menm pase krèm douko pou chanje koulè po yo. Lan menm sans sa a gen moun ki mete pèmanant pou fè cheve yo siwèl. Men, m remake moun sila yo vin esklav paske chak fwa yo sispann pase krèm, po yo vin gen yon koulè ki pa bobo ak bèl koulè moun lan te genyen avan l douko a, sa ki vin fè moun lan oblije nan tounen pase krèm jis li bobi. Pèmanant lan menm jan an, w ap toujou remake cheve grenn pa w la pouse chak fwa ou fè kèk tan ou pa ko remete pèmanant. Se kòmsi li vle raple w rasin ou, pou l di w men kiyès ou ye. N ap pwofite raple li enpòtan pou w aprann aksepte moun ou ye a.
Aprann renmen tèt ou ak valorize tèt ou annantye, lè sa moun ap respekte w san ou pa mande sa. Epi, y ap ba w lanmou san ou pa mande. Paske ou se premye moun ki dwe tèt ou respè ak lanmou. Sispann goumen ak pwòp tèt ou. Aprann renmen chak pati nan kò w ak menm dimansyon lanmou lè sa w ap viv pi byen. Pa bliye ou se sèl grenn moun ki ka di men kòman ou vle moun trete w ak wè w nan je yo.
Otè : Francesca PETIT-FRÈRE
Whatsapp: 36570949
Nou rekòmande w atik sa a:
Clique sur ce lien si toi aussi tu veux publier ton article sur haititchala.com : InfoPUBLICATION
--
VWA TOUT MOUN KONTE !
Restons connectés
.png)
.png)
Self-love
RépondreEffacer